Was e Pracht

Net jeder hot, ´s wär ´n scheene Draam, en dolle Gadde wohl daham,
wo er die Blumme bliehe sieht, wo mer Gemies un Obst aach zieht.
Wer also nor seu Wohnung hot, der geht halt efders frisch un flott,
in so en Park, dort is-es schee, es lohnt sich, oft dorthie zu geh.

Brauch mer mal Blumme, dann steht fest, dass mer sich ned lang hänge lasst,
un geht glei zu ´ner Gärtnerei. Mer find´aach dort die Sache glei,
die mer sich so hat vorgestellt. Wie herrlich bunt is dort die Welt
im Lade, dass sich Fraa un Maa vun dort fast net trenne kann.

In Bessunge e Gärtnerei hot en Mordsgadde glei dabei.
Da blieht´s un grient’s, es is e Pracht, was mer dort alles hat vollbracht.
Wer kaafe wollt paar Blume bloß, fer den is die Versuchung groß,
im Gadde erstmal rumzugeh; ach, sin die Pflanze dort so schee.

Wer sich den Kram genaa guckt an, dort garnet iwwerseje kann
aach Palme un Bananebeem, die stehn im Gadde so bequem
mit lauter Blumme drumerum; sowas gefällt dem Publikum.
So Gärtnereie sin e Wucht, es lohnt sich, wenn mer se besucht.

„Werner Rühl„